×

新导航介绍,点击查看

嗰啲「一個九毫」嘅日子

发表日期:2008-05-10 摄影器材: 景区:会同 点击数: 投票数:
  喺嗰个铺满尘嘅书架上面,我攞出咗一本《七龙珠》嘅漫画,已经唔系记得好清楚到底系边年边月买嘎喇。虽然表面重几新凈,但里面啲纸张都已经泛黄。
  书脊上标住「海南摄影美术出版社」,皆因当年翻版书猖獗,买书望书脊已经系指定动作。呢个出版社,伴随住我哋由童年过度到少年,后嚟渐渐退出历史舞台,完成佢对我哋呢代人嘅历史使命。再望望封底右下角,「每集1.90元」嘅字样赫然入目。
  喺好长一段时间里面,《七龙珠》、《女神的圣斗士》都系必追嘅漫画(虽然内地嘅书名译得有啲老套),嗰时书报摊嘅阿婶就好似比老师重亲切嘅人噉,有时等成个星期都唔见出新书,心急就会去问佢几时有得卖,当然,一有新书到就掉低两文,攞住本书连钱都唔记得问人找就跑喇,谂住快啲返屋企睇吖嘛!然后呢,次次都系畀人叫返转头攞返嗰一毫纸。
  喺嗰时,同学仔、朋友仔谈论嘅嘢几乎都系一样嘅,咩动画片好睇啦,边个有好睇嘅漫画啦,漫(动)画里面嘅剧情啦,啲闪卡炒到几钱张啦,放学去边玩捉伊人啦,就连女生,好似对呢啲都有兴趣(嗰时内地好似重未有咩少年漫画、少女漫画嘅概念)。至于学习上面嘅,我谂多数系讲吓边个叻啲就啰边个嘅笔记同作业抄之类……
  得到再大啲先知道,原嚟人系咁多分歧嘅,就攞运动嚟讲吖,有人钟意田径,有人钟意足球,有人钟意篮球,有人钟意羽毛球。漫画呢,原嚟都唔系个个会买嚟睇个喔,而且个个品味都唔一样,同啲唔啱key嘅人讲漫画,会觉得佢九唔搭八。我觉得我哋好似班一齐起巴比伦塔嘅人,畀上帝扰乱晒共同语言。嗰种感觉,好讨厌。
  而家,如果你啱啱想同人讨论琴晚某出肥皂剧嘅内容,你嘅朋友或者同事可能会同你讲:我都唔睇电视嘅!又或者讲琴晚我出咗街之类。然后当嗰个答你嘅人同另外一个人讲:有冇听过阿边个首新歌啊?另一个人又会答佢:我都唔钟意阿边个啲歌个喔,佢啲歌都好听嘅咩?然后,喺呢几个讲嘢嘅人周围,都弥漫住一种尴尬嘅气氛。
  望住嗰啲「一个九毫」嘅漫画书,我谂起咗好多嘢。哈,人真系奇怪,以往嘅记忆本嚟都有好多系伤心嘅事,但回想过嚟,每件事都觉得好有趣。每个片段,都整整齐齐摆喺我脑里面,就好似一本本「一个九毫」嘅漫画书整整齐齐摆喺书柜噉……


每集1.90元嘅《七龙珠》漫画
关键词:圣斗士动画七龙珠漫画一個九毫

作者:猪肉佬

《嗰啲「一個九毫」嘅日子》


下一篇:没有了

最 新:
没有其它新的作品了

更多猪肉佬的POCO作品...

评论