×

新导航介绍,点击查看

角楼上嘅碰头声

发表日期:2008-05-15 摄影器材: 点击数: 投票数:

  曾经有篇文章讲述咗「我们这一代」嘅尴尬,里面讲到:当我哋未有能力搵钱嘅时候,啲楼系分配嘅。到我哋出嚟搵钱嘅时候,啲楼系要买嘅,但又贵到买唔起……
  但坦白讲,「我们这一代」算系好幸福了。点解噉讲呢?住过以前啲平房嘅人,都应该知道咩叫「搭角仔」,就系喺原嚟有限嘅空间里面用木搭一个夹层,多数祗限于瞓觉、放杂物之类。旧时啲屋普遍都好细,得十几平方左右,成家人就住喺豆腐膶咁细嘅地方,如果屋企兄弟姊妹多嘅话点算呢?唯有日头放台凳,夜晚铺床板喇。所以,「搭角仔」就系最有效最实际嘅利用空间之好办法,啫系好似而家啲复式设计噉啰!
  我重记得好清楚,当我重喺祖屋住嘅时候,我系瞓角仔嘅,个角仔系老窦一手一脚搭嘅,大概系比我坐高高十公分左近,稍微想企起身就会碰到头,「嘣」!一声,我就喺角楼上起多层「楼」(起咗个瘤就真),虽然系噉,但系我都几钟意瞓角仔嘎,而且嗰时角仔正对住厅嘅电视机,我好多时都喺上面趴住睇电视,总觉得嗰种居高临下嘅感觉好盏鬼。
  而家想搵十几平方嘅屋可能都好难啦,梗系啦,放个似样啲嘅橱柜都占咗十个方以上,重使喐嘅?家阵啲新生代当然冇办法理解,就连自己都返唔到去以前嘅生活模式啰。以前嘅屋都系冇厕所嘅,冲凉嘅地方都好细,好多都连住厨房,所以会见到好多人摆个盘出街帮细佬哥冲凉,嗰啲情景真系好有生活味。厅里面嘅家具好多都系一代传一代嘅酸枝台凳,睡房嘅上面通常间个角仔,墙上嘅摆设唔系放神台就系放先人嘅黑白相。噉就系六、七十年代普通老百姓嘅一个屋企。
  嗰时啲屋,一砖一瓦都系自己(屋主一家人,部分会请人)砌上去嘅,设计师、泥水佬、木工、水电工都全部DIY(唔系点解征地拆屋嗰时咁多人唔肯搬啊)。到家庭成员多咗喇,通常就加高一两层,所以旧区嗰啲屋嘅高度系参差不齐嘅。比起以前,而家有钱就可以买到屋,省咗咁多劳动量,其实都算幸福啦。不过而家懒人多,十八岁都未识炒冷饭嘅大有人在,赚呢啲人嘅钱梗系容易啦!
  而家啲楼楼底多数都好矮,不过面积有返咁上下,就冇必要搭角仔啦,我家阵训醒嗰阵都唔使惊企高撞亲头喇。不过呢,睇住啲高楼大厦越来越多,反而怀念喺旧屋住嘅日子,难忘旧屋嘅古雅朴素,难忘角楼上嘅碰头声。

关键词:旧屋这一代搭角仔角楼碰头

作者:猪肉佬

《角楼上嘅碰头声》


下一篇:没有了

最 新:
没有其它新的作品了

更多猪肉佬的POCO作品...

评论