×

新导航介绍,点击查看

往昔龙舟水

发表日期:2008-05-29 摄影器材: 点击数: 投票数:
  如今企喺呢条路上面,依然感觉到脚下有水流动……
  喺陈年旧月里嘅「一湾溪水绿,两岸荔枝红」如今已不复见。喺我懂事嘅时候,根本冇「荔枝湾」呢个概念喇,不过当时住喺泮塘,荔湾湖嘅景色唔多唔少都让我联想到以往嘅「白荷红荔泮塘西」系点样一种景致。
  喺荔枝湾路呢度,旧时系一条河涌,泮溪酒家行上啲嘅斜坡,就系贯穿呢条涌嘅桥,记得以前只要每逢端午节前,桥两头就会塞满人,啲人都系嚟睇爬龙舟嘅。虽然条涌唔算好阔,但四五只肯定系过到,当时老窦带我嚟睇嘅时候,我重系可以「骑角马」嘅年纪,只记得当时好热闹,喺桥上面望落去,几条龙舟「雪」声话咁快就走咗,只剩低鼓声吶喊声久久未散,至于涌两边啲屋,除咗起喺河边之外,同屋企附近啲冇咩分别。
  以前每逢行过呢处,因为条涌比较臭,都要走快几步,更加唔好话留低睇风景。睇嚟我哋呢代之所以睇唔到当年南国荔枝湾嘅风貌,同上几辈人嘅环保观念有关,不过据老窦描述,呢度叫「文塔脚」,细佬哥嗰阵呢条涌啲水好清,重可以游水添。其实喺呢一带,以前都系洼地、田基,一派水乡嘅幽雅,我谂当年嘅景致应该不亚于如今嘅周庄。
  由于后嚟搬咗出去,好几年冇嚟过呢度,再路过嘅时候,发现已经填咗路。尤其近几年,呢度变化更大,昔日路过臭河涌,如今已变古玩街。以前嘅骑楼、瓦背顶、麻石路,都已经近乎绝迹;以往熟悉嘅街坊都搬嘅搬,走嘅走;泮溪酒家都换咗老细,重新装修过……所谓沧海桑田,我谂无非都系噉啫。
  正谂住抱怨「贵人出门招风雨」,不觉已到洪五月。有人话,汶川地震搞到天都流泪。我就唔多赞成呢种讲法,如果呢排唔落雨,我谂到咗秋天,要喊嘅唔系个天,系农民伯伯喇。唔使几耐又要爬龙舟,唔知今年会唔会加插啲震灾义演呢,不过今年一样要去到珠江边先有得睇啰。
  以前想睇爬龙舟,好多地方都有,出名啲嘅,就如猎德村。后嚟喺黄埔嗰边做嘢,见到嗰边嘅祠堂都摆住几只龙舟,想必以前呢附近都有爬龙舟。不过家阵睇龙舟,好似畀珠江垄断咗,虽然规范,却少咗好多地方特色。
  穿过记忆嘅时空,企返喺荔枝湾路呢度,原嚟已经落紧雨,而雨声将化作流水声,雷声亦化作鼓鸣,龙舟水到,往昔爬龙舟嘅意境重喺度,只系,你哋睇唔见啫。
关键词:荔枝湾泮塘龙舟水爬龙舟河涌

作者:猪肉佬

《往昔龙舟水》


下一篇:没有了

最 新:
没有其它新的作品了

更多猪肉佬的POCO作品...

评论