×

新导航介绍,点击查看

被压扁嘅花朵

发表日期:2008-05-29 摄影器材: 点击数: 投票数:

  今日啱啱睇完「新闻透视」,今期终于讲到四川学校倒冧嘅事喇,呢次地震死得最多嘅系学生,冧得最彻底嘅系学校,至于原因,就算有线电视唔畀我睇,都估倒七八成啦。
  电视里面嘅情景唔使旁白都可以睇得好明,承重墙同支柱冇几多条钢筋,有啲甚至冇,剩得啲砖,讲得好听啲就系「设计有问题,审批部门疏忽」等等,讲句难听啲就系腐败,就算唔识起屋嘅人都唔会起成噉,补充:只有啲抽惯水嘅高手先做到。
  地震中呢啲学校可以话系粉碎,入面嘅学生无端端做咗「夹心饼」,而且倒冧嘅绝大部分都系新教学楼,啲旧楼反而冇事。一查之下,只有两间学校符合国家标准,当然亦只有呢两间校舍保住学生嘅命。啲家长都开始有所行动喇,我谂啲领导人都唔会睇唔到啩?
  全国哀悼嘅三日,都只有睇中央台,我谂睇惯春晚嘅人会习惯佢哋啲腔调,我就好似睇「诗朗诵」噉,话唔畀睇娱乐节目喔,唔通特区台冇震灾报道嘅?大家都知中央台嗰家嘢嘎啦,报喜不报忧,广东人话斋:「攞景定赠兴啊」?好喇,到三日过咗,一睇特区台啲新闻,就有讲某家商店点侵吞救援物资攞嚟卖,喺度发国难财云云。今日又听到话,NBA太过具有「娱乐性」,唔畀睇喔!唔知边个戆居领导话唔好将体育同政治挂勾嘅呢?
  呢啲都算喇,不过攞学生啲命嚟教飞实在无耻,我记得自我上小学以嚟就有咩「希望工程」,一直读到大学都重有,咩「添砖加瓦」,咩「让贫困学生都可以上学」,当时我重捐唔少添,捐到我都几乎冇书读咁济。如果呢啲「豆腐渣」系我哋呢啲人当年捐嘅钱起嘅,噉早知我唔捐好过啦,重槽肥晒山区啲贪官添,罪过罪过啊!
  同为地震带嘅建筑物,民居、政府办公楼大部分都屹立不到,然而学校几乎一夜间全部夷为平地。又话学生系祖国未来嘅花朵,噉种花法嘅我都第一次听。压扁晒啲花朵不特止,园丁都钉咗唔少,你话第日边个重敢去四川做老师吖嗱?
  老温今次去完灾区巡视,返嚟唔知会唔会又抓一批人出嚟呢?如果唔抓,啲家长唔肯过佢;如果抓,啲官唔肯过佢。你话做人几难,唔怪得咁多白头发啦。

关键词:学校花朵学生豆腐渣四川地震

作者:猪肉佬

《被压扁嘅花朵》


下一篇:没有了

最 新:
没有其它新的作品了

更多猪肉佬的POCO作品...

评论